李華度6大理由　力撐摩連奴執教巴塞

巴塞隆拿教練沙維將於今季結束後離隊，會方仍然未決定新帥人選，巴塞名宿李華度認為，可以聘請摩連奴執教，並列出6大理由，支持「寸王」可以勝任巴塞主帥一職。

現年52歲嘅李華度球員時代曾於1997至02年效力巴塞隆拿，佢話雖然好多人希望哥迪奧拿回歸領軍，但以目前情況睇，佢短期內唔會離開曼城，可以考慮自由身嘅摩連奴：「好多球迷唔鍾意由前死敵主帥執教，但其實摩連奴早年效力過巴塞，輔助當時教練卜比笠臣及尹戈爾，其次佢係一位偉大人物，第3摩連奴屬於自由身，比其他有教職在身嘅名帥，較大機會加盟，第4佢幫皇馬捧過西甲冠軍，非常熟悉西甲情況，第5佢執教波圖同國際米蘭，都奪得歐聯冠軍，第6摩連奴有37年教波經驗，奪得26項錦標，戰績非常輝煌。」

不過，李華度承認摩連奴性格比較倔強，可能會做出爭議性行為同言論，引致同球迷關係緊張，但佢始終係一位球壇贏家。