生死战失纵　柏基达遭锤仔球迷丧插

韦斯咸上场欧霸杯8强次回合生死战火并利华古逊，最终未能平反败局遭淘汰，球迷梗系唔开心，但更令球迷激气系当日停赛嘅卢卡斯柏基达冇到场支持，丧插佢唔爱球队。

《每日邮报》报道，卢卡斯柏基达近日传闻再获曼城斟介，今夏将会离队，球迷已经睇佢唔顺眼，今场生死战对利华古逊，韦斯咸大部分唔落得场嘅球员几乎全部到场，只得柏基达同另一位养伤嘅马夫洛柏路斯缺席，锤仔球迷将矛头全部指向柏基达。

有球迷插佢：“受伤嘅艾路拿嚟咗，停赛嘅艾马臣柏美尼喺度，连外借去修咸顿嘅费恩唐尼斯，都赶路180英里返嚟打气，个个都喺度，柏基达去咗边？”

另一球迷表示：“韦斯咸今季最重要赛事都唔嚟，柏基达谂紧乜，都好清楚啦。”

不过亦有球迷为柏基达发声：“大家都为柏基达冇嚟就小题大做，佢平时受伤缺阵都唔会嚟啦，咪同屋企人睇电视直播啰。”