阿仙奴贏狼隊「止血」　暫登聯賽榜首

近期喺英超同歐聯接連受到打擊嘅阿仙奴，周日(21日)凌晨英超作客2比0擊敗狼隊，終止連續3場不勝頹勢。「兵工廠」贏波後以74分暫時升上榜首，領先踢少1場嘅曼城1分，仍未放棄一絲爭標希望。

阿仙奴今場控制局面，但進攻未見銳利，狼隊上半場僅有攻勢反而差啲入波，祖奧高美斯勁射被大衞拉耶撲到再中楣。大難不死嘅阿仙奴，完半場前由李安度杜沙特妙射領先，下半場局勢未有太大改變，最後補時階段馬田奧迪加特超窄角度射入，帶領阿仙奴贏2比0。

阿仙奴領隊阿迪達賽後表示：「經過情緒起伏嘅1個星期，球員仍展示出堅毅性格，拎到一場好重要嘅勝仗同保持不失，我哋要全力準備好最後5場比賽。」阿仙奴周三(24日)凌晨又要主場對車路士，星期日(28日)作客熱刺，硬仗連場。