【有片】溫布萊最後一舞　堤亞高施華完場爆喊

今季成績低迷嘅車路士，周日(21日)凌晨英足盃4強出局後，巴西中堅堤亞高施華激動痛哭，佢老婆喺社交網指今仗係施華喺溫布萊球場「最後一舞」，間接證實佢夏天將會離隊。以「四大皆空」嚟告別車路士，難怪堤亞高施華哭成淚人。

39歲嘅堤亞高施華同車路士今約夏天到期，雙方仍未就續約談判，傳聞呢位中堅打算返巴甲比賽。車路士今季聯賽成績雖然差勁，但喺盃賽表現唔錯，英聯盃決賽飲恨利物浦腳下，今次英足盃4強出局，意味今季唔會有任何冠軍落袋。

堤亞高施華完場後痛哭：https://twitter.com/i/status/1781757397679092184　

堤亞高施華離隊前再捧盃願望落空，賽後佢忍唔住爆喊，老婆Belle喺社交網留言「溫布萊最後一舞」，暗示堤亞高施華唔會再留隊。堤亞高施華痛哭一幕令球迷心痛，有球迷就發現馬度基喺施華後面，同基亞利殊邊講邊大笑，網民留言：「馬度基做乜咁開心？如果車路士有多3個施華咁嘅心態嘅球員，點會冇冠軍拎？」