曼聯大鑊！再有3人受傷缺陣英足盃

曼聯將於香港時間周日(21日)晚上10時30分英足盃4強對高雲地利，賽前紅魔鬼傳來不利消息，根據「轉會權威」記者羅曼諾(Fabrizio Romano)爆料，中場美臣蒙特、蘇夫恩岩拉伯特、中堅甘華拉受傷，無緣今場大戰，紅魔鬼今季傷兵增至60人次。主帥坦哈格手上只有哈利馬古尼1位中堅可用，防線出現重大危機。

美臣蒙特今季長期養傷，蘇夫恩岩拉伯特並非主力，兩人缺陣影響唔算太大，最大鑊係年輕中堅甘華拉都傷埋，加上莊尼伊雲斯、華拉尼、利辛度馬天尼斯、域陀連迪路夫仍在養傷，現時只有哈利馬古尼1位中堅可以候命，坦哈格早前透露馬古尼都有輕傷在身，佢今場能否發揮正常水準，實屬疑問。

唯一安慰係麥湯米尼傷愈可以復出，坦哈格可能安排防守中場卡斯米路客串中堅位置，同哈利馬古尼扼守中路。