烏杜治做手術收咧　緣盡歐國盃

熱刺右閘烏杜治周六(21日)喺社交網宣布，佢日前進行手術根治傷患，今季將會提早收咧。呢位意大利國腳未有透露傷勢詳情，不過消息指佢將會缺陣3個月，意味夏天嘅歐國盃決賽周亦唔能夠參加。

21歲嘅烏杜治今季係熱刺左閘必然正選，表現出色亦入選意大利國家隊，佢對上7場聯賽都踢足90分鐘，未見有受傷情況，但佢周六喺社交網貼出自己喺醫院嘅相片，留言表示：「傷患令我今個賽季提早完結，感激所有人今季對我嘅支持。」

由於熱刺今個星期未有賽事，所以領隊普斯迪高路冇安排記者會，球會亦冇公布烏杜治嘅傷勢情況。據權威記者Fabrizio Romano消息，熱刺預計烏杜治要休息3個月時間，難以代表意大利出戰歐國盃決賽周。