VAR三度放生　愛華頓「扣分打吡」贏森林

英超「扣分打吡」愛華頓主場對諾定咸森林，愛華頓獲球證及VAR放生，三次無判12碼，喺主場以2:0擊敗森林，護級情況得以紓緩，相反森林離降班區只有1分距離，前景危危乎。

兩支被賽會扣分嘅球隊，賽前分別排16及17，愛華頓比諾定咸森林多1分。「拖肥糖」今場雖有主場之利，但雙方互有攻守，23分鐘，森林攻擊球員基奧雲尼雷拿被艾舒利楊格禁區內踩跌，但球證安東尼泰萊認為冇事，跟住29分鐘愛華頓就憑伊祖沙古爾禁區外遠射得手領先1比0。

球賽去到44分鐘又再出現爭議判決，森林左路攻勢，赫臣奧杜爾底線前逗個波出中路，皮球撞中艾舒利楊格右手改變方向出底線，但安東尼泰萊直指角球，森林球員瘋狂投訴，而VAR亦冇介入事件，愛華頓上半場領先1比0。

下半場愛華頓又再走甩12碼，又係艾舒利楊格，54分鐘佢喺禁區內踢跌赫臣奧杜爾，球證同VAR都係毫無表示，之後喺75分鐘愛華頓再入一球，以2比0擊敗森林。