利物浦3比1贏富咸　高普未放棄爭標

周一(22日)凌晨英超，利物浦作客3比1擊敗富咸，衝破聯賽2場不勝同歐霸盃出局陰霾，依家追到同榜首阿仙奴同分(74分)，領先踢少1場嘅曼城1分。「紅軍」領隊高普賽後表明未放棄爭冠，希望贏盡餘下5輪，再等待幸運女神眷顧。

利物浦上周中歐霸盃8強出局，今仗正選作出6個調動，32分鐘憑阿歷山大阿諾特射入精彩罰球領先，但完半場前被卡斯泰尼追平；換邊後利物浦繼續施壓，賴恩格雲貝治53分鐘轟入世界波，亦係佢喺英超第1個入球；迪亞高祖達喺72分鐘建功，為利物浦鎖定3比1勝局。

利物浦周四(25日)凌晨會作客愛華頓，贏波就可以領先曼城4分，高普賽後表示：「球季最後衝刺，冇國際賽同歐洲賽事分心，我哋可以100%專聯賽。或者幸運女神會幫我哋，但我哋先要盡量贏晒、拎盡分數，可能會有幸運嘅時刻。英超爭逐一定會好緊湊同好有趣。」