又系比宁咸绝杀！皇马3比2挫巴塞隆拿

周一(22日)凌晨西甲“国家打吡”，皇家马德里同巴塞隆拿合演激战，最终皇马主场3比2反败为胜，首循环喺补时攻入致胜球嘅祖迪比宁咸，今场再一次成为“绝杀”英雄，成为17年来首个喺头2次参加“国家打吡”都入波嘅皇马球员。

首循环巴塞主场喺领先情况下，被比宁咸连入2球反胜，今仗巴塞作客亦先开纪录，安达斯基斯坦臣6分钟就接应角球顶入，皇马喺18分钟由卢卡斯华斯基斯博到12码，云尼斯奥斯祖利亚操刀追平。69分钟费明卢比斯为巴塞再次领先，但4分钟后就被卢卡斯华斯基斯追成2比2。

去到补时1分钟，卢卡斯华斯基斯右路传中，两队球员门前大漏，伏兵远柱嘅比宁咸狂抽入网，带领皇马赢3比2。比宁咸连续2场射爆巴塞，成为2007年嘅云尼斯达莱后，第1个喺头2次参加“国家打吡”都入波嘅皇马球员。

皇马赢波后领先次席巴塞11分，联赛冠军近在咫尺，教练安察洛堤赛后表示：“今场胜仗非常重要，依家有好大优势，但我哋唔可以放松，要尽量抢分同准备欧联4强。比宁咸喺适当嘅时间挺身而出，佢非常落力，呢个入波可能会系冠军嘅关键。”