安東尼入場做過乜？挑釁動作被轟無恥

曼聯喺英足盃殺入決賽，不過掌聲更多係畀表現更好嘅英冠球隊高雲地利，「紅魔鬼」由領先3球到崩潰，序幕就係由安東尼馬菲奧斯入替開始，但呢位巴西翼鋒喺射贏12碼後，竟然向高雲地利球員挑釁，被網民炮轟無恥。

安東尼喺66分鐘入替阿歷真度加拿祖嗰陣，曼聯領先緊3比0，但佢落場後球隊就開始唔識踢，被高雲地利連追3球。安東尼喺加時戰都係碌碌無為，甚至連互射12碼嘅5輪都冇份參與，點知當海倫射入致勝12碼後，安東尼就轉身向住高雲地利球員，做出用手擺耳仔後面，同埋雙手拎高曼聯波衫嘅動作挑釁。

網民見到呢一幕，紛紛炮轟安東尼「無恥」，前水晶宮、高雲地利球員摩利臣批評：「安東尼應該擔心自己份工，而唔係關心高雲地利，因為以佢今季嘅表現，下季隨時會落英冠比賽。」曼聯領隊坦哈格被問到安東尼嘅行為，呢位荷蘭教頭就耍太極：「我睇唔到安東尼做乜，所以評論唔到，我只知道我好尊敬高雲地利。」