安东尼入场做过乜？挑衅动作被轰无耻

曼联喺英足杯杀入决赛，不过掌声更多系畀表现更好嘅英冠球队高云地利，“红魔鬼”由领先3球到崩溃，序幕就系由安东尼马菲奥斯入替开始，但呢位巴西翼锋喺射赢12码后，竟然向高云地利球员挑衅，被网民炮轰无耻。

安东尼喺66分钟入替阿历真度加拿祖嗰阵，曼联领先紧3比0，但佢落场后球队就开始唔识踢，被高云地利连追3球。安东尼喺加时战都系碌碌无为，甚至连互射12码嘅5轮都冇份参与，点知当海伦射入致胜12码后，安东尼就转身向住高云地利球员，做出用手摆耳仔后面，同埋双手拎高曼联波衫嘅动作挑衅。

网民见到呢一幕，纷纷炮轰安东尼“无耻”，前水晶宫、高云地利球员摩利臣批评：“安东尼应该担心自己份工，而唔系关心高云地利，因为以佢今季嘅表现，下季随时会落英冠比赛。”曼联领队坦哈格被问到安东尼嘅行为，呢位荷兰教头就耍太极：“我睇唔到安东尼做乜，所以评论唔到，我只知道我好尊敬高云地利。”