暗示黑哨？森林指控VAR球证系卢顿球迷

诺定咸森林喺周六(21日)英超护级大战，作客0比2不敌爱华顿，输波后继续排尾4(26分)，领先尾3嘅卢顿1分。森林今场输波争议性十足，佢哋有3个12码事件，都被球证同VAR否决，赛后森林罕见发出声明，指控VAR球证艾治维系护级对手卢顿嘅球迷，暗示佢系因为帮助爱队而做出不利森林嘅判决。

今场3个争议12码事件，都关维拉老将艾舒利杨格事，包括禁区内踢跌雷拿、伸手挡波以及从后撞跌赫臣奥杜尔，但全部都被“放生”。森林赛后发声明谴责：“3个极差判决──3个12码都冇畀，完全唔能够接受。球会赛前已向PGMOL(英国职业裁判员公司)警告，VAR球证系卢顿球迷，但佢哋并冇换人，我哋嘅耐性已被多次挑战，森林会考虑可以采取乜嘢行动。”

森林今季多次成为争议判决受害者，球会早前请到前英超球证卡顿保做顾问，负责同PGMOL沟通，但成效麻麻，上月联赛就因球证错判公正球被利物浦绝杀。《The Athletic》报道，PGMOL话事人韦比表示，卡顿保赛前未有提出更换VAR球证要求，只提及森林领队纽奴可能会喺记者会，公开艾治维系卢顿球迷嘅事。

根据英超球证条例，所有球证需要向PGMOL申报佢哋支持嘅球队，而球证唔会被安排执法相关球队同佢哋竞争对手嘅比赛。据报PGMOL正调查森林嘅声明内容，森林或会因不当言论被处分。