命硬！利華古遜「又」翻生　創不敗紀錄

新鮮出爐德甲冠軍利華古遜，依家向住全季不敗嘅目標進發，周日(21日)作客多蒙特再一次死過翻生，補時7分鐘入波逼和對手1比1，成為德甲史上首支頭30輪聯賽保持不敗球隊。利華古遜今季所有賽事45場不敗，近期多次喺輸波邊緣走返出嚟，相當「命硬」。

兩隊今仗勢均力敵，多蒙特81分鐘由富克洛建功，以為將會贈利華今季首場敗仗，但史坦尼錫97分鐘接應角球頂入，成功保住利華金身。利華上周中歐霸盃作客韋斯咸，又係89分鐘入波逼和1比1，佢哋最近11場比賽，有5場都係去到第88分鐘仍然落後，但最終都可以追和或反勝。

利華教練沙比阿朗素賽後表示：「我哋只係唔想輸波，補時入波非常激動人心，能夠同球迷慶祝意義非凡。」多蒙特總監基爾就話：「我哋本來可以成為第1支擊敗利華嘅球隊，但佢哋狀態好好，而且仲有必要嘅運氣，贏唔到波我哋好失望。」