命硬！利华古逊“又”翻生　创不败纪录

新鲜出炉德甲冠军利华古逊，依家向住全季不败嘅目标进发，周日(21日)作客多蒙特再一次死过翻生，补时7分钟入波逼和对手1比1，成为德甲史上首支头30轮联赛保持不败球队。利华古逊今季所有赛事45场不败，近期多次喺输波边缘走返出嚟，相当“命硬”。

两队今仗势均力敌，多蒙特81分钟由富克洛建功，以为将会赠利华今季首场败仗，但史坦尼锡97分钟接应角球顶入，成功保住利华金身。利华上周中欧霸杯作客韦斯咸，又系89分钟入波逼和1比1，佢哋最近11场比赛，有5场都系去到第88分钟仍然落后，但最终都可以追和或反胜。

利华教练沙比阿朗素赛后表示：“我哋只系唔想输波，补时入波非常激动人心，能够同球迷庆祝意义非凡。”多蒙特总监基尔就话：“我哋本来可以成为第1支击败利华嘅球队，但佢哋状态好好，而且仲有必要嘅运气，赢唔到波我哋好失望。”