高爾彭馬爭金靴　隊友：勁過夏蘭特！

車路士喺英足盃出局後，今季肯定「四大皆空」，不過前鋒高爾彭馬依家同艾寧夏蘭特並列射手榜第1位(20球)，有機會爭番個金靴獎。車路士守將馬路古斯圖就講明要幫高爾彭馬爭神射手，仲話佢勁過艾寧夏蘭特！

高爾彭馬近5場聯賽入10球，一口氣衝上射手榜第1位，高爾彭馬對於有機會爭金靴獎表示驚訝：「講真我覺得好好笑，上季呢個時間我同夏蘭特仲係隊友，從來冇諗過依家會同佢入波一樣多，尤其睇過佢上季狂入球，依家嘅情況真係好瘋癲。」

高爾彭馬講得輕鬆，不過佢隊友馬路古斯圖就好認真：「如果要揀，我寧願高爾彭馬做隊友(好過夏蘭特)。高爾彭馬係好特別嘅球員，好開心球隊有佢喺度，我哋要做嘅就係幫佢拎金靴獎！」