阿仙奴睇中施斯高　「買斷費」啱胃口

阿仙奴今季雖然係英超入波最多球隊(77球)，不過陣中缺乏一位多產射手，最多入波嘅球員已經係右翼布卡約沙卡(14球)。為進一步加強鋒力，據報阿仙奴有意收購RB萊比錫前鋒施斯高，佢合約內有4,300萬鎊買斷條款，相當「抵買」。

據報阿仙奴原本想簽艾雲東尼、域陀奧森漢呢類頂級前鋒，但隨住夏維斯由中場轉番做箭頭有良好效果，領隊阿迪達就改變計劃，想簽個年輕可造之材嚟培育，20歲嘅施斯高就成為目標。呢位斯洛文尼亞前鋒今季喺RB萊比錫並唔係必然正選，喺德甲只有14次擔正，但就有10個入球進帳。

施斯高上年由薩爾斯堡加盟RB萊比錫，消息指佢合約內有4,300萬鎊買斷條款，喺依家嘅轉會市場絕對係偏低價錢，不過有傳車路士同曼聯都想打佢主意，競爭肯定非常激烈。