阿仙奴睇中施斯高　“买断费”啱胃口

阿仙奴今季虽然系英超入波最多球队(77球)，不过阵中缺乏一位多产射手，最多入波嘅球员已经系右翼布卡约沙卡(14球)。为进一步加强锋力，据报阿仙奴有意收购RB莱比锡前锋施斯高，佢合约内有4,300万镑买断条款，相当“抵买”。

据报阿仙奴原本想签艾云东尼、域陀奥森汉呢类顶级前锋，但随住夏维斯由中场转番做箭头有良好效果，领队阿迪达就改变计划，想签个年轻可造之材嚟培育，20岁嘅施斯高就成为目标。呢位斯洛文尼亚前锋今季喺RB莱比锡并唔系必然正选，喺德甲只有14次担正，但就有10个入球进帐。

施斯高上年由萨尔斯堡加盟RB莱比锡，消息指佢合约内有4,300万镑买断条款，喺依家嘅转会市场绝对系偏低价钱，不过有传车路士同曼联都想打佢主意，竞争肯定非常激烈。