皇馬留用老臣子　準備同華斯基斯續約

皇馬在國家打吡3比2擊敗巴塞隆拿，焦點集中在攻入絕殺球嘅祖迪比寧咸身上，但出力最多嘅其實係右閘盧卡斯華斯基斯，今場3個入球佢都有分參與，更射入第2球，據報皇馬已向佢開出續約報價，打算留用。

盧卡斯華斯基斯年屆32歲，皇馬青訓出身，在一隊效力長達9個球季，贏過4次歐聯、3次世冠盃同3次西甲，其合約今夏到期，皇馬對待30歲以上球員係逐年傾，盧卡斯華斯基斯都唔例外。

雖然唔及其他隊友咁光芒四射，但盧卡斯華斯基斯在陣就有穩定軍心作用，今場國家打吡後，祖迪比寧咸喺社交網用爆口留言大讚「Lucas Vazquez you Fxxxxxx Legend」，又有球迷將佢幅相換咗巴西名宿卡富個頭，叫佢做Cafucas。

對於去留，盧卡斯華斯基斯暫未有決定，亦未有球會對佢有興趣，雙方對於續約都持樂觀態度。