領先3場　大衞拉耶金手套叫胡

阿仙奴上輪聯賽2比0擊敗狼隊，亦係門將大衞拉耶今季第13場聯賽保持清白身，領先第2位愛華頓嘅比克福特3場，今季餘下5輪賽事，只要再多3場零封對手，就肯定攞到金手套獎。

28嘅大衞拉耶今季由賓福特外借加盟阿仙奴，最初領隊阿迪達話佢會同蘭斯達爾良性競爭，結果當然唔係咁，大衞拉耶火速企穩正選門將一職，蘭斯達爾淪為後備，雖然係借將身分，但有消息指其實雙方已簽定一分明年夏天生效嘅正式合約，轉會費2,700萬鎊(約2.64億港元)，到時就會自動加盟。

現時大衞拉耶有機會問鼎金手套獎，證明阿迪達當初決定換龍門冇做錯，而暫時最可能威脅到大衛拉耶金手套獎嘅門將，就係愛華頓嘅比克福特，佢暫時累積10次零封，排第3係富咸嘅賓特尼奴，9次零封，並列第4有3人，分別係曼聯奧拿拿、阿士東維拉嘅達米安馬天尼斯同曼城艾達臣摩拉斯，8次零封。