领先3场　大卫拉耶金手套叫胡

阿仙奴上轮联赛2比0击败狼队，亦系门将大卫拉耶今季第13场联赛保持清白身，领先第2位爱华顿嘅比克福特3场，今季馀下5轮赛事，只要再多3场零封对手，就肯定攞到金手套奖。

28嘅大卫拉耶今季由宾福特外借加盟阿仙奴，最初领队阿迪达话佢会同兰斯达尔良性竞争，结果当然唔系咁，大卫拉耶火速企稳正选门将一职，兰斯达尔沦为后备，虽然系借将身分，但有消息指其实双方已签定一分明年夏天生效嘅正式合约，转会费2,700万镑(约2.64亿港元)，到时就会自动加盟。

现时大卫拉耶有机会问鼎金手套奖，证明阿迪达当初决定换龙门冇做错，而暂时最可能威胁到大卫拉耶金手套奖嘅门将，就系爱华顿嘅比克福特，佢暂时累积10次零封，排第3系富咸嘅宾特尼奴，9次零封，并列第4有3人，分别系曼联奥拿拿、阿士东维拉嘅达米安马天尼斯同曼城艾达臣摩拉斯，8次零封。