车路士大镬　高尔彭马病咗唔出得

车路士喺英足杯出局后，今季肯定“四大皆空”，不过前锋高尔彭马近5场联赛入10球，一口气冲上射手榜榜首，依家同艾宁夏兰特并列射手榜第1位（20球），本来有机会争番个金靴奖，但临开波前迎来坏消息，彭马仔因病差不多肯定缺阵今场“伦敦打吡”。

车仔领队普捷天奴喺赛前记者会，特别提到高尔彭马因病缺席操练，被问到能否对阿仙奴上阵，普帅表示：“如果以呢日情况睇，我会话‘No’。我哋比赛日朝早会睇吓个进展系点，但以今日情况预计，我唔相信佢可以踢。不过即使彭马个病好番，佢都未必有状态去比赛。”

高尔彭马今季各项赛事为车路士射入23球及贡献13个助攻，系车仔嘅进攻泉源，球队冇咗佢肯定影响甚大。此外，普捷天奴亦透露，芝维尔及马路古斯图亦未能于今场“伦敦打吡”上阵。