【有片】白界波爭議！巴塞：唔排除要求重賽

西甲日前「國家打吡」出現極大爭議，皇家馬德里3比2絕殺巴塞隆拿一仗，喺上半場仲係1比1嗰陣，耶馬射門被皇馬門將盧連白界線上擋出，VAR判個波未越過白界。據報巴塞賽後分析過片段，認為個波當時已經完全入界，會長拉波塔要求西班牙足總提供判決證據，如果證實球證犯錯，唔排除會要求重賽。

由於西甲並冇安裝「鷹眼」系統，白界爭議只能靠VAR去判決，西班牙足總周一(22日)公開VAR房嘅錄音，顯示VAR球證並唔肯定：「冇白界線技術......我哋搵緊證據，但盧連身體擋住(視線)....呢個鏡頭唔得...呢個都唔得...呢個都唔得...冇其他鏡頭啦？我哋冇證據證明個波入咗，準備恢復比賽。」

科技分析白界爭議波：https://twitter.com/i/status/1782344212802830522　

據報巴塞透過科學技術分析，認定耶馬射門已經過晒白界，會長拉波塔表明：「我知球證工作好困難，所以VAR應該係幫助實現公平競技，而唔係相反。西班牙足總要公開所有判決資料，如果分析後發現出錯，我哋會作出相應行動，如果證實個波已經入咗，我哋會提出重賽要求。」