堤亞高施華今夏落「車」　等同馬些路做隊友

車路士喺英足盃4強出局之後，中堅堤亞高施華哭成淚人，根據「轉會權威」記者羅曼諾(Fabrizio Romano)爆料，呢位39歲巴西老將已經決定唔續約，將於今夏約滿以自由身離隊，有可能加盟巴甲球隊富明尼斯，同前皇馬左後衞馬些路做隊友。

堤亞高施華2020年夏天由巴黎聖日耳門轉投車路士，當時只簽1年合約，其後憑出色表現獲得續約，佢近日暗示已經「夠皮」：「我喺車路士4年過得唔錯，始終好少球員可以39歲仲踢緊英超。」據悉堤亞高施華好快會公布去向。

堤亞高施華今季為車路士上陣32場入4球，平均每場有4.8次解圍，盛傳佢最大機會加盟富明尼斯，皆因佢曾於富明尼斯青年軍受訓，並喺2006至08年效力呢支巴甲勁旅，然後轉投AC米蘭，展開球星之路，對富明尼斯有一份情意結，希望喺富明尼斯踢到掛靴。