講邊個？摩連奴：曼聯6年前「毒瘤」仲喺度

曼聯今季表現備受批評，領隊坦哈格面臨被炒魷危機，喺2016年至18年教過曼聯嘅摩連奴，近日接受英國傳媒訪問，評論曼聯依家情況嗰陣，直指6年前佢想踢走嘅「毒瘤」仍然在陣，矛頭直指英格蘭左閘勞基梳爾。

摩連奴離開曼聯後，先後已教過熱刺同羅馬，佢接受《每日電訊報》訪問表示：「曼聯依家仲有幾個，我喺5、6年前已經想踢走嘅人，以曼聯嘅規模，我覺得佢哋唔係最專業嘅球員，時間會說明一切，我都希望曼聯可以取得成功。」

喺摩連奴執教曼聯最後一季，仍有幾個球員仲在陣，包括勞基梳爾、拉舒福特、安東尼馬迪爾、域陀連迪路夫、達洛治同麥湯米尼等，英國傳媒指摩連奴矛頭首選係勞基梳爾，事關兩人之前一直傳出不和，摩連奴亦唔只一次公開批評佢嘅狀態同比賽態度。