讲边个？摩连奴：曼联6年前“毒瘤”仲喺度

曼联今季表现备受批评，领队坦哈格面临被炒鱿危机，喺2016年至18年教过曼联嘅摩连奴，近日接受英国传媒访问，评论曼联依家情况嗰阵，直指6年前佢想踢走嘅“毒瘤”仍然在阵，矛头直指英格兰左闸劳基梳尔。

摩连奴离开曼联后，先后已教过热刺同罗马，佢接受《每日电讯报》访问表示：“曼联依家仲有几个，我喺5、6年前已经想踢走嘅人，以曼联嘅规模，我觉得佢哋唔系最专业嘅球员，时间会说明一切，我都希望曼联可以取得成功。”

喺摩连奴执教曼联最后一季，仍有几个球员仲在阵，包括劳基梳尔、拉舒福特、安东尼马迪尔、域陀连迪路夫、达洛治同麦汤米尼等，英国传媒指摩连奴矛头首选系劳基梳尔，事关两人之前一直传出不和，摩连奴亦唔只一次公开批评佢嘅状态同比赛态度。