貝迪斯想簽迪基亞　但有一個條件

迪基亞離開曼聯將近1年，呢位西班牙門將至今未能落班嘅原因係人工太高，據報西甲貝迪斯將會再嘗試向佢招手，條件係迪基亞必須降低人工要求。

33歲嘅迪基亞喺曼聯期間係頂薪球員，周薪高達35萬鎊，最終因為踢法唔啱主帥坦哈格心水而未獲留用。迪基亞離開曼聯後收到多間球會邀請，包括來自沙特球會高薪合約，但佢都一一拒絕，一直處於無業狀態至今。

《體育競技場》報道，西甲貝迪斯今夏守門員大執位，哥迪奧巴禾離隊，雷爾施華獲意甲球隊挖角，將被出售，貝迪斯希望簽入一名具分量門將，迪基亞係人選之一。

不過貝迪斯無法承擔迪基亞天價人工，如果對方唔肯降薪，貝迪斯就會放棄迪基亞，轉為斟介巴塞副選門將恩拿斯奧彭拿。

至於迪基亞會否轉戰西甲，佢暫時未表態，不過佢個人社交網就見到端倪，上星期佢出PO，係同曼聯隊長般奴費南迪斯合照，兩人拍晒膊頭，可見迪基亞仍然心繫曼聯，據報坦哈格今夏好大機會離隊，迪基亞可能正在等待重返「紅魔鬼」嘅機會。