拜仁睇中「逼搶之父」　路明尼加力撐

拿高斯文宣布留任德國國家隊後，正在搵教練嘅拜仁慕尼黑又要換新目標，據報佢哋睇中現任奧地利國家隊領隊、人稱「逼搶之父」嘅蘭歷克，並獲得名宿路明尼加大力支持。

多間傳媒報道，拜仁現時搵新帥有多個目標，最有機會係蘭歷克，另外仲有阿士東維拉領隊艾美利，以及白禮頓領隊迪薩比，其中65歲嘅蘭歷克機會最高，其最大優勢係佢係德國人，懂得拜仁文化，佢本身喺德國足壇有一定地位，更獲名宿路明尼加支持，自然成為首選。

對於拜仁邀請，蘭歷克表示持開放態度，拜仁會方則希望盡快拍板，可能向奧地利足總直接買斷合約，雙方合約原定到2026年世盃後，拜仁願意畀轉會費，如果成事，蘭歷克教畢今夏歐國盃就去拜仁上任。

蘭歷克執教過多支德甲球隊，外號「逼搶之父」，不過真正執教大球會只係2021至22年擔任曼聯看守領隊半個球季，戰績一般，不過離開曼聯後改任奧地利國家隊領隊至今，就有唔錯成績。