保衞家園！英球星歐國盃請特種兵看屋

鑑於近年英超球星出外比賽期間家園頻頻被賊人光顧，今屆歐國盃個別國腳有新安排，就係聘請前特種部隊成員幫手看屋，保護家園財物。

《每日郵報》報道，英超球星近年成為盜賊重點關注對象，事關球星有固定行程，特別係跟隊出國比賽，屋企冇人，賊匪根據球隊行程就可知道球星去向，趁佢哋唔喺屋企入屋爆竊，任攞唔嬲，過去唔少球星損失慘重。

今屆歐國盃在德國舉行，英格蘭被列為奪標熱門，預期至少打入4強，賽事為期個多月，球星家園「後防空虛」勢必引來盜賊光顧，為解決保安問題，有英軍球星決定豪花數十萬鎊，採用「軍事級別」保護措施嚟守護家園。

據報，有球星將會安裝紅外線夜視攝影機、聘用前特種部隊人員看屋，總花費高達25萬鎊(約245萬港元)，哈利馬古尼、比克福特同基亞利殊都會幫襯，仲已經落晒訂，特別係基亞利殊曾經係苦主之一，試過出外比賽期間被盜竊價值100萬鎊財物，而且當時有家人仲喺屋內，經此一役，基亞利殊決定畀錢買個安心。