【赛后解码】兵工厂真灵魂　奥队创造8次机会做MVP

阿仙奴可以大胜车路士5比0，除咗两位梅开二度球员夏维斯、宾韦特演出神勇之外，队长马田奥迪加特亦有好大功劳，呢位25岁挪威国脚全场创造8次入波机会，包括贡献2次助攻，赛后力压3位入波嘅队友，当选为今场官方最佳球员，足以证明“奥队”先至系兵工厂真正灵魂人物。

虽然马田奥迪加特今场冇波入，但有多项数据属于双方球员之冠，包括82次触球、8次创造入波机会、8次对抗胜出、3次成功扭过对手。赛后主帅阿迪达大赞呢位爱将：“我哋一致认同马田系1位拥有巨大天赋嘅球员，为球队增添特别元素，佢获得大家喜欢同专重，凭个人领导能力及魅力，每个人都愿意跟随佢。”马田奥迪加特今季英超已有8球进帐及8次助攻。

至于宾韦特获球迷投票选为今场最佳球员，呢位26岁后卫表现攻守兼备，唔止射入2球，仲有3次关键传波，8次对抗有6次胜出。难怪英格兰主帅修夫基希望呢位防守大将改变主意，重新答应为国家队比赛。