慘成玻璃腳　 迪亞高祖達又傷抖兩周

利物浦出戰周四(25日)凌晨「默西賽德郡打吡」作客愛華頓前夕，傳來不利消息，剛傷愈復出冇耐嘅前鋒迪亞高祖達，又再次受傷，估計需要休息2星期，意味將錯過對愛華頓、韋斯咸、熱刺嘅英超賽事。

利物浦領隊高普出席賽前記者會時透露有關消息：「好不幸迪亞高祖達上場入波之後，感到不適，應該係臀部受傷，將缺陣2星期，呢個時候出現傷兵問題，當然唔好啦。」

迪亞高祖達今年2月中對賓福特，整傷膝部，直至今個月歐霸盃對阿特蘭大，先至復出，上場對富咸，取得復出後首個入波，可惜又受傷，呢位27歲葡萄牙國腳希望爭取5月14日凌晨復出踢英超對阿士東維拉。