英格蘭球星有福　歐國盃或維持26人名單

今屆歐國盃決賽周將於當地時間6月14日喺德國揭幕，但每隊大軍名單係23人，亦或26人仍然存在變數。根據英國《太陽報》爆料，歐洲足協可能作出讓步，沿用上屆做法，容許每隊徵召最多26位球員，英格蘭等球星如雲嘅傳統勁旅成為最大得益者。

歐國盃及世界盃傳統上每隊只准揀選23位球員，由於新冠疫情關係，考慮到球員健康，兩項賽事上屆都破例將大軍名單增至26人。不過，球壇已經復常，歐洲足協計劃今屆恢復23人名單舊制，結果引來唔少反對聲音。

東道主德國主帥拿高斯文、法國領隊迪甘斯率先表態，認為應該維持26人「新制」，講到尾各隊主帥都希望手上有更多球員調動。與此同時，有更多球星可以參賽，亦係球迷之福。

據悉歐洲足協態度出現軟化，將於未來幾日，討論名單人數問題，相信好快有定案。