場外帽子戲法　科頓將第三度做爸爸

曼城中場菲爾科頓今季腳風極順，各項賽事合共已有22球進帳，創下職業生涯單季入球高新，當中英超對賓福特、阿士東維拉，都上演「帽子戲法」入3球。呢位23歲英格蘭國腳場外亦表現大勇，佢透露將第三度做爸爸，生仔都要「戴帽」。

菲爾科頓同拍拖多年嘅女友Rebecca Cooke已經育一仔一女，佢哋日前舉行派對，並影全家福上載到社交網，公布第三位BB即將降臨。

菲爾科頓非常早熟，18歲已經做爸爸，大仔Ronnie喺2019出世，兩年之後迎來女兒True，佢似乎仲未滿足，依家又將會添丁，莫非想學兩位球王C朗、美斯做「多仔公」？