白禮頓轉性　將重金增兵

白禮頓近年高價出售多位主力，賺到盤滿砵滿，但今季嘗到惡果，成績大倒退，會方不敢怠慢，準備改變轉會政策，由「出口」轉為「入口」，計劃今夏以2,700萬鎊(約2.6億港元)收購費倫天拿翼鋒尼高拉斯干沙利斯。

自從三笘薰2月中開始養傷之後，白禮頓成績急轉直下，近10場比賽僅2勝，充分反映「海鷗」以往太依賴呢位日本翼鋒策動攻勢，一旦「折翼」，戰鬥力立即大減。

領隊迪薩比都知道問題所在，打算今夏簽入翼鋒，增加鋒線選擇，以免下季重蹈覆徹，並睇中鋒尼高拉斯干沙利斯。呢位26歲阿根廷國腳近2季入波都達雙位數，包括今季各項賽事上陣35場入11球及4次助攻，並協助費倫打入歐協聯4強。根據《米蘭體育報》爆料，白禮頓將會同費倫天拿展開交易判談。

另外，白禮頓上年夏天將前鋒安達夫外借去史特加，呢位27歲德國國腳表現大勇，今季德甲已有17球進帳及8次助攻，據悉史特加計劃買斷佢，但白禮頓有錢都唔賺，準備收回安達夫，希望可以提升下季成績。