【官宣】艾美利續約至2027年　拜仁死心啦

阿士東維拉正式宣布，領隊艾美利已經同意續約至2027年，早前曾經傳出德甲勁旅拜仁慕尼黑有意聘請呢位52歲西班牙名帥執教，依家可以死心。

艾美利2022年10月臨危受命，執掌阿士東維拉帥印，球隊成績蒸蒸日上，現時排英超第4位，好大機會獲得下屆歐聯入場券。艾美利領軍能力備受認同，加上拜仁慕尼黑計劃挖角，所以維拉急不及待，提早同佢續約。

艾美利接受球會官網訪問時話：「我好享受同維拉球迷、球員、管理層合作，我哋有共同目標及理想，特別係擁有一班偉大球員，對佢哋表現感到非常驕傲，球隊要繼續努力，保持水準，相信可以達成目標。」

阿士東維拉已打入今屆歐協聯4強，艾美利執教阿仙奴期間，曾獲得歐霸盃亞軍，更加協助維拉利爾捧走歐霸盃冠軍，歐洲賽經驗豐富，維拉上下都期望艾美利能夠為球隊帶來近42年首項歐洲主要賽事錦標。