利物浦想學曼聯？睇中荷蘭光頭名帥

利物浦聘請新帥接替高普，一波三折，繼頭號目標沙比阿朗素決定留喺利華古遜之後，另一位人選士砵亭教練魯賓艾摩廉亦可能被韋斯咸截胡。根據「轉會權威」記者羅曼諾(Fabrizio Romano)爆料，利物浦打算改斟飛燕諾教練施洛。

據悉利物浦已經接觸過施洛，將佢列為新帥候選人之一，預料雙方將會安排正式會面，討論加盟嘅可能性。現年45歲嘅施洛曾經執教過荷甲球隊阿爾克馬爾，2021年轉投飛燕諾，至今帶領呢支荷甲勁旅踢過144場比賽，贏咗94場，包括獲得2021/22年度歐協聯亞軍，最威水係奪得上季荷甲冠軍，今季亦捧走荷蘭盃冠軍，現時聯賽排第2位，落後榜首燕豪芬9分。

不過，唔少網民認為施洛即使帶領飛燕諾取得佳績，但執教英超豪門未必掂，隨時係另一位荷蘭光頭名帥坦哈格嘅翻版。