終極轉軚！沙維決定留隊　續教巴塞隆拿！

巴塞隆拿教練沙維今年初宣布季尾離隊，不過隨住球隊下半季表現回勇，巴塞亦極力游說佢改變主意。周三(24日)經過2場最高層會議後，沙維最後作出「終極轉軚」，答應下季繼續留隊執教，巴塞副會長尤斯迪亦公開證實呢個「天大喜訊」。

巴塞近2仗先後喺歐聯出局以及「國家打吡」輸波，不過球隊今年反彈表現有目共睹，挽留沙維係首要任務。會長拉波塔、副會長尤斯迪、總監迪高周三同沙維會面，首次會議未有共識，一眾高層夜晚再去拉波塔屋企繼續商討，並成功令沙維改變主意，據報一眾高層即場係會長屋企開慶祝派對。

尤斯迪率先公開證實：「沙維將會留隊，佢覺得好開心，我哋從來冇同其他教練展開過斟介，迪高非常信任沙維，呢個係一大保證。」現年44歲嘅沙維喺2021年11月接掌巴塞帥印，上季帶領球隊贏得西甲冠軍，領軍能力受到肯定。