兰历克证实拜仁斟介　一个要求成关键

德甲劲旅拜仁慕尼黑失落联赛冠军后，正积极物色新帅代替季尾离队嘅杜曹，前曼联领队兰历克日前证实，佢已收到拜仁嘅斟介，而且表明“有得倾”，大有机会成为拜仁新帅。

依家执教奥地利国家队嘅兰历克证实：“拜仁已经同我接触，我亦上报奥地利足总。”被问到有冇兴趣接手，兰历克就回应：“如果拜仁话要我，我会问自己想唔想要？如果我决定行另一条路，我会先通知奥地利足总。”

兰历克喺德甲享负盛名，除咗做教练之外，近年更多时间做足球顾问，掌管成间球会嘅发展方向。权威记者Fabrizio Romano报道，兰历克对于薪酬并冇意见，重点系佢有足够冇权力去带领球队，呢一点亦成为兰历克系咪加盟嘅关键。

兰历克亦开宗明义表示：“钱唔重要，我考虑嘅系其他。我系咪可以带嚟改变？我有冇机会发展一支成功嘅球队？不过我依家会专注奥地利国家队，集中备战欧国杯决赛周。”