利物浦有望周末簽施洛　荷甲勝率低過坦哈格

利物浦物色新領隊計劃再有進展，英國同荷蘭傳媒報道，「紅軍」已同飛燕諾展開斟介，有望支付1,000萬歐元轉會費羅致荷蘭教頭施洛，順利嘅話有望喺今個周末完成交易。45歲嘅施洛被視為「坦哈格2.0」，不過佢喺荷甲嘅勝率，就輸畀該曼聯領隊。

喺沙比阿朗素決定留喺利華古遜後，利物浦曾經同魯賓艾摩廉無限接近，不過近日瘋傳施洛先係「紅軍」心儀目標，因為佢嘅逼搶戰術同進攻風格，都比較接近依家嘅利物浦。雖然施洛合約並冇買斷條款，不過利物浦依家正同飛燕諾談判，預計1,000萬歐元轉會費就可以「成交」，英國《每日郵報》指交易最快喺今個周末完成。

施洛曾執教阿爾克馬爾同飛燕諾2支荷甲勁旅，領軍204場錄得126勝，勝率係61.8%；至於坦哈格執教過伊高斯、烏德勒支同阿積士，367次領軍有232場勝仗，勝率達63.2%，比施洛稍勝一籌。