利物浦有望周末签施洛　荷甲胜率低过坦哈格

利物浦物色新领队计划再有进展，英国同荷兰传媒报道，“红军”已同飞燕诺展开斟介，有望支付1,000万欧元转会费罗致荷兰教头施洛，顺利嘅话有望喺今个周末完成交易。45岁嘅施洛被视为“坦哈格2.0”，不过佢喺荷甲嘅胜率，就输畀该曼联领队。

喺沙比阿朗素决定留喺利华古逊后，利物浦曾经同鲁宾艾摩廉无限接近，不过近日疯传施洛先系“红军”心仪目标，因为佢嘅逼抢战术同进攻风格，都比较接近依家嘅利物浦。虽然施洛合约并冇买断条款，不过利物浦依家正同飞燕诺谈判，预计1,000万欧元转会费就可以“成交”，英国《每日邮报》指交易最快喺今个周末完成。

施洛曾执教阿尔克马尔同飞燕诺2支荷甲劲旅，领军204场录得126胜，胜率系61.8%；至于坦哈格执教过伊高斯、乌德勒支同阿积士，367次领军有232场胜仗，胜率达63.2%，比施洛稍胜一筹。