車路士亂局　球員反對炒普捷天奴

車路士上場聯賽「倫敦打吡」淨吞阿仙奴5蛋，踢到潰不成軍，班主保利震怒，據報會方最快48小時內辭退領隊普捷天奴，不過大部分球員提出反對，希望普帥留隊，高層同球員持相反意見，亂局再起。

由於今季戰績低落，普捷天奴無法獲得會方支持，被炒幾乎係唯一結局，而喺「倫敦打吡」慘敗後更加速普帥被炒命運。有消息指，班主保利將於下場聯賽作客阿士東維拉時決定普捷天奴命運，如果輸波就會即時解僱。

另邊廂，車路士絕大部分球員都支持普捷天奴留隊，希望保持球隊穩定。《晚旗報》報道，經歷近2年換帥及混亂後，球員渴望穩定，如果再換帥將重覆經歷動盪，永無寧日。

雖然普捷天奴獲得更衣室大多數人好評，但佢過分保護球員免受批評，亦被指太軟弱，不利球隊爭勝。