18分鐘首演輸波　簡拿華路：頭頭碰着黑！

周五(26日)凌晨意甲補賽，有簡拿華路首次領軍嘅烏甸尼斯，喺呢場18分鐘嘅首演補時5分鐘失守，主場1比2不敵羅馬。烏甸尼斯輸波後排尾4，只係靠得失球壓住尾3嘅費辛隆尼，護級前路凶險。

呢場聯賽上星期踢咗72分鐘，因為羅馬中堅安迪卡心臟出現問題而腰斬，當時比數係1比1，餘下18分鐘喺周五補踢，烏甸尼斯亦換上簡拿華路領軍，可惜球隊表現麻麻，喺補時5分鐘被白賴仁基斯坦迪頭槌攻陷，慘輸1比2。

簡拿華路賽後表示：「就算只係踢20分鐘，見到球員都好緊張，我一直叫佢哋要冷靜。過去2日我盡量令球隊減少犯錯，但時間太短成效有限，我會重新檢視球隊所有問題，依家烏甸尼斯頭頭碰着黑，唔可以靠晒運氣，要停止出現致命錯誤。」