北倫敦打吡球證　竟係「利申」紅軍球迷！

英超球證執法水平一直充滿爭議，上星期諾定咸森林喺護級大戰輸畀愛華頓後，發聲明指控VAR球證係「盧頓球迷」，有利益衝突之嫌。估唔到英國職業裁判員公司(PGMOL)未學精，今個星期「北倫敦打吡」熱刺對阿仙奴，竟然安排已「利申」係利物浦球迷嘅球證主理VAR，再次引起爭議。

熱刺周日(28日)主場對阿仙奴，屬於英超爭逐關鍵賽事，PGMOL日前宣布主球證由奧利華擔任，不過VAR球證就由嚟自澳洲嘅吉列擔任，佢曾5次當選澳職最佳球證，2019年加入英超球證團隊。根據英超球證條例，所有球證要申報自己支持嘅球隊，而吉列嘅「愛隊」就係利物浦，所以從未執法過利物浦以及同市球隊愛華頓嘅正式賽事，只係試過喺一場利物浦元老賽執法，實現夢想。

今次任命引起唔少爭議，尤其上星期先發生「盧頓球迷」事件，委任吉列執法利物浦爭標對手阿仙奴嘅賽事，明顯會有利益衝突。阿仙奴季初作客0比1輸畀維拉，出任主球證嘅吉列曾爭議性否決夏維斯嘅12碼申訴。