般費骨折照「頂硬上」　鐵人數據曝光！

曼聯今季任命般奴費南迪斯做隊長，一度引起唔少批評，不過呢位葡萄牙國腳就用表現證明，坦哈格搵佢做隊長係正確決定。據報般奴費南迪斯雖然手骨骨折，上場聯賽對錫菲聯仍堅持上陣，最終靠佢2個入波幫曼聯反敗為勝，而佢加盟曼聯4年竟然從未因傷缺陣，係真正鐵人。

曼聯喺英足盃淘汰高雲地利一戰，般奴費南迪斯曾落地整傷右手，據報有骨折情況，不過上場聯賽佢就堅持紮住上，右手手腕用大量繃帶包實，慶祝入球嗰陣亦明顯保護隻右手，以防被隊友撞傷。就算右手重傷，般奴費南迪斯仍然成為贏波英雄，表現獲球迷一致讚賞。

英國《每日鏡報》報道，般奴費南迪斯有個神奇數據，自佢2020年2月為曼聯首演，之後曼聯241場比賽，般奴費南迪斯踢咗229場，缺陣嘅12場當中，有5場係坐波監、3場係做後備未落場，另外有3場休息同1場因病缺陣，從來未試過因為受傷而唔踢。