意甲前鋒成搶手貨　阿仙奴5年約斟舒克斯

博洛尼亞係今季意甲神奇球隊，目前排第4位有望來季出戰歐聯，陣中前鋒約舒亞舒克斯更成為搶手貨，據報呢位荷蘭新星受到米蘭雙雄同祖雲達斯垂青，英超勁旅阿仙奴更搶先開出5年合約，希望收購呢位可造之才。

《米蘭體育報》同《都靈體育報》報道，22歲嘅舒克斯受到熱烈挖角，其中AC米蘭同祖雲達斯早就表示興趣，近期國際米蘭同阿仙奴亦加入戰團，阿仙奴開出周薪10萬鎊(未計獎金)嘅5年合約，正同舒克斯嘅經理人接觸，預計球季完結就會正式出手。

舒克斯喺1月轉會窗曾被曼聯斟介，不過當時佢表示未係時候：「如果你問我想令博洛尼亞變得偉大，定係即刻去一間偉大球會，我會揀先令博洛尼亞變得偉大，之後自然會有大球會睇到。」意大利傳媒指舒克斯嘅轉會費，估計要6,000萬歐元。