華基爾雲迪積克認證：施洛好啱利物浦！

利物浦聘請施洛執教好事近，作為荷蘭同胞嘅華基爾雲迪積克，日前率先開聲力撐，指施洛係荷蘭其中一個最佳領隊，足球哲學亦好啱利物浦，似乎對「後高普年代」充滿信心。

雖然施洛未正式加盟，但華基爾雲迪積克日前接受荷蘭記者訪問，就搶先發表對施洛嘅意見：「我認為施洛係依家荷蘭其中一個最佳領隊，睇佢嘅球隊比賽同佢嘅足球哲學，佢可以勝任利物浦主帥。不過以我所知，談判仲未成事，即管睇下點樣，呢啲都係下季嘅事，仲有好長時間。」

施洛上季帶領飛燕諾贏得荷甲冠軍，今季亦已捧走荷蘭盃冠軍，佢嘅4-3-3戰術同逼搶風格，都同利物浦踢法相近，「紅軍」球員喺適應上或者可以更順利。