曼聯洗清安東尼　斟水晶宮快翼

曼聯股東拉特克利夫開始為來季組軍，除決定坦哈格去留，漏洞之一嘅翼鋒位置將進行補救，今季所有賽事2球2助攻、英超0球1助攻嘅安東尼馬菲奧斯將被出售，其空缺由水晶宮快翼米高奧利斯補上。

《鏡報》報道，外號「圓規」嘅安東尼馬菲奧斯，係因為坦哈格前來曼聯執教，先會由阿積士前後腳加盟，轉會費係超高價嘅9,500萬歐元，當時已經有人批評明搵曼聯笨，而事實證明該巴西翼鋒唔值咁貴，兩季過去，《轉會市場》對其估價僅餘2,800萬歐元，身價大跌超過7成。

「拉爵」入股半季後睇出問題，球隊改革由清洗安東尼馬菲奧斯開始，希望今夏尋求買家接手，而其空缺亦搵到補充人選，目標人物係水晶宮翼鋒米高奧利斯。

水晶宮已宣布，米高奧利斯同伊比爾治伊斯兩大主力都會接受各大豪門報價，兩人底價均為6,000萬鎊(約5.8億港元)，「拉爵」準備引入米高奧利斯，但由於身價不菲，因此打算一個換一個，先出售安東尼馬菲奧斯，再買米高奧利斯。