李斯特城重返英超！37歲華迪將續約

周六(27日)凌晨英冠，第2位列斯聯作客以0比4大敗於昆士柏流浪腳下，令到榜首李斯特城「不戰而勝」，提早鎖定前2位直接升班資格。「狐狸兵團」闊別一季之後，下季將重返英超，37歲前鋒占美華迪仍未言退，將會續約再戰英超。

列斯聯近期狀態走下坡，今仗對住中下游球隊昆士柏流浪，更加兵敗如山倒，慘吞4蛋。由於列斯聯只剩下1場聯賽，並落後李斯特城4分，肯定無法超前對方，加上第4位修咸頓已落後「狐狸兵團」10分，所以李斯特城出戰下周二(30日)凌晨作客普雷斯頓之前，已自動提早鎖定前2位直接升班資格。

李斯特城隊長占美華迪約全部隊友到屋企，一齊睇列斯聯對昆士柏流浪嘅直播，當完場後，立即大肆慶祝。根據《The Athletic》爆料，李斯特城落實取得英超席位後，將會同占美華迪續約，呢位射手寶刀未老，今季各項賽事上陣35場入18球，其中踢33場聯賽入16球，屬於「狐狸兵團」取得升班資格嘅大功臣，絕對值得獲續約。