彭馬可復出鬥維拉　但又增添兩位傷兵

車路士將於周日(28日)凌晨英超作客阿士東維拉，賽前車仔領隊普捷天奴透露好消息，因病缺陣上場英超嘅中場高爾彭馬已經痊愈，可以出戰今場聯賽，但亦增添史達寧、卓胡安美卡兩位傷兵。

普捷天奴話：「我肯定高爾彭馬可以復出，佢係1位非常出色球員，亦係球隊關鍵人物，佢知道球隊冇咗佢，會遇上麻煩。」車路士上仗缺少高爾彭馬之下，以0比5不敵阿仙奴，呢位21歲英格蘭國腳今季英超已入20球，同艾寧夏蘭特並列射手榜第1位，同時有9次助攻，成為車路士靈魂，網民嘲諷車路士應該改名，由「Chelsea F.C.」變成「Palmer F.C.」。

另外，史達寧、卓胡安美卡加入傷兵名單之後，加上安素費南迪斯做手術，提早收咧，車路士現時已經有12位傷兵。