利物浦又失分　2比2憾和韋斯咸

周六晚(27日)英超早場，利物浦又失分，作客先落後劣勢下與韋斯咸踢成2比2，表現令人失望，近年對韋斯咸交手首次贏唔到，繼續排第3，距離英超冠軍愈行愈遠。

「默郡打吡」失利後，利物浦今場再變陣，收起穆罕默德沙拿同達雲紐尼斯，迪亞高祖達繼續倦勤，3箭頭起用路易斯迪亞斯、加普同哈維艾利洛，韋斯咸則有查洛保雲復出。

上半場利物浦反客為主圍攻對手，加普同哈維艾利洛起腳都冇料到，表現最好係路易斯迪亞斯，多次叩關都有威脅，包括一次左路內切可惜射中柱。至於韋斯咸專心打突擊，更於43分鐘憑查洛保雲接應古達斯左路傳中，門前頭槌頂成1比0領先半場。

易邊後「紅軍」加強壓迫，48分鐘憑安德魯羅拔臣接應路易斯迪亞斯傳中門前快射入網，扳平1比1，65分鐘加普右路勁射，省中奧邦拿反彈門前湯馬士蘇錫克，最後再彈中門將艾路拿入網，利物浦反超前2比1。

戰至77分鐘，韋斯咸一次反擊機會，查洛保雲右路傳中，米查利安東尼奧頭槌頂成2比2，最終雙方握手言和各得1分。