富咸天才中堅決定離隊　豪門瘋搶

已經護級上岸嘅富咸，其22歲天才中堅艾達拉比奧約今夏約滿，雖然會方開出續約報價，但遭拒絕，球員並於近日通知會方今夏離隊，由於優質中堅稀缺，英超各隊瘋搶在所難免。

「轉會專家」羅曼諾報道，艾達拉比奧約今夏約滿後決定離開富咸，並已將決定通知會方，佢將會以自由身與各間英超豪門進行談判。

艾達拉比奧約於曼城青訓出身，但從未為「藍月亮」上陣，出道後曾外借到西布朗及布力般流浪，2020年夏天以200萬鎊(約1,950萬港元)轉投富咸，下次轉會曼城可獲20%分成。球員在富咸效力4個球季，經歷降班同重返英超，近日決定離開成名地，向更高水平挑戰。

據報多間英超豪門對呢位英格蘭中堅有興趣，包括利物浦、熱刺、紐卡素、阿仙奴同曼聯，到時任佢挑選。